الكاتب : أشرف محمدين 

فيه رجالة عندهم موهبة مدهشة في “عدم الرضا”، مهما كان عنده أفضل شيء في الحياة، يفضل يدور على حاجة تانية، ولو سألته “إيه اللي ناقصك؟” هيقولك: “مش عارف… بس حاسس إني عايز حاجة جديدة!” وده ينطبق تمامًا على الراجل اللي ممكن يتجوز أجمل أربع ستات في الكون، وبرضه تلاقيه في الآخر بيخونهم برضه و مع ستات اقل منهن في كل حاجة 

الزوجات الأربع… والنتيجة واحدة!
    1.    الجميلة:
ربنا كارمه بزوجة جمالها يخطف القلوب، ماشية في البيت كأنها باريس هيلتون تلبس على أحدث صيحات الموضة، وكل مرة تخرج معاه الناس تحسده عليها، وبرضه في الآخر تلاقيه معجب بواحدة لابسة عباية و ماشيه في السوق 
    2.    المثقفة:
مش بس جميلة، دي كمان عندها ماجستير، او دكتوراه مثقفة، تتكلم في السياسة، الأدب، والفن، وتعرف تسد أي حوار… وبرضه تلاقيه باعت مسجات لـ”الشغالة” يقولها: “إنتي بتعرفي تعملي محشي؟” هو ده الحوار اللي شدك؟ و تلاقيه هيموت علي ام رمضان و هي بتمسح السيراميك 
    3.    المطيعة:
متواضعة، هادية، بتسمع الكلام، بتحب البيت، وبتعامله زي الملك… وبرضه مش عاجبه و  تلاقيه بيروح للسكرتيرة و يقولها : “حاسس معاكي براحة نفسية غريبة!” راحة إيه يا خويا؟ هي كاوتش العربية؟ ما اللي في البيت مريحاك و مدلعاك 
    4.    الذكية:
دماغها جبّارة، تحل مشاكله قبل ما تحصل، تفهمه بنظرة، وبتساعده ينجح في حياته… وبرضه في الآخر يلاقي نفسه مشدود لجارته ام شيماء  اللي كل مساهمتها في الحياة إنها بتقول “حاضر يا بيه!” و تؤمر يا سي السيد 
و السوال لماذا يخون الرجل 
    1.    لأنه بيحب التحدي العجيب
بعض الرجالة عندهم هوس بـ”الممنوع مرغوب”، لو الدنيا كلها قدمت له اللي يتمناه، برضه عقله يقول: “أكيد فيه حاجة أحلى مستخبية!”
    2.    عنده مشكلة مع المثالية
لما تكون زوجته كاملة الأوصاف، يحس إنها حلم، والحلم بيبقى مخيف… لكن الشغالة او اي تاء مربوطة ؟ الشغالة واقع، سهل، ومافيهوش أي ضغوط فكرية!
    3.    بيحب الدراما المجانية
بعض الرجالة عندهم حب للمغامرات الغبية، يعني لو حياته مستقرة، لازم يخلق أزمة بنفسه، ويعيش جو التوتر والإثارة حتى لو النتيجة “علقة موت” من زوجته!
    4.    دماغه متبرمجة على الغلط
مهما حاولت الزوجة تبقى كاملة، الراجل اللي عينه زايغة مش هايفرق معاه، لأنه ببساطة مش بيدور على الكمال، ده بيدور على “أي حاجة غير اللي عنده”!
او بالأدق بيحاول يقنع نفسه و يبرر لها بالكذب أن الحاجة دي مش عنده            ببساطة الراجل الغير قادر ان يقدر زوجته و يعرف قيمتها ها يفضل طول حياته مش عاجبه العجب حتي لو انجوز ألف ست .. فالست بتدور علي راجل يرد فيها الروح تكمل معاه حياتها اما  الرجل ابو عين زايغة تلاقيه بيدور علي اي انثي فيها الروح و السلام 

يا عزيزي  الرجل، قبل ما تتورط وتلاقي نفسك في موقف صعب، فكر: “هل أنت فعلاً محتاج تعمل كده؟ ولا دي مجرد نزوة مالهاش أي معنى؟” لأنك في النهاية… مش بس هاتخسر زوجتك، ده ممكن كمان تخسر صحتك بعد “علقة تاريخية” مش هتنساها طول عمرك!